Siðareglur brotnar í umfjöllun um tengdadóttur Jónínu

Siðanefnd Blaðamannafélags Íslands hefur komist að þeirri niðurstöðu, að Ríkisútvarpið Sjónvarp og Helgi Seljan, sjónvarpsmaður, hafi brotið með alvarlegum hætti gegn siðareglum félagsins í umfjöllun um íslenskan ríkisborgararétt, sem sambýliskona sonar Jónínu Bjartmarz, þáverandi umhverfisráðherra, fékk.

Fjallað var fyrst um málið í fréttum og Kastljósi Sjónvarpsins þann 26. apríl og í kjölfarið var fjallað um málið í fleiri Kastljósþáttum. Jónína kærði þessa umfjöllun til siðanefndar Blaðamannafélags Íslands.

Í niðurstöðu sinni segir nefndin, að umfjöllun Sjónvarpsins um málið hafi verið röng og misvísandi og til þess fallin að gera Jónínu tortryggilega. Þetta eigi einkum við um upphaf umfjöllunarinnar, í pistli Helga Seljan 26. apríl. Rangfærslurnar hafi verið leiðréttar smám saman en engu að síður litað alla umfjöllunina.

„Fréttamaður lét undir höfuð leggjast að afla grundvallarupplýsinga í viðkvæmu máli. Þau vinnubrögð brjóta í bága við 3. gr. siðareglna Blaðamannafélags Íslands, en þar segir svo: „Blaðamaður vandar upplýsingaöflun sína, úrvinnslu og framsetningu svo sem kostur er og sýnir fyllstu tillitssemi í vandasömum málum. Hann forðast allt sem valdið getur saklausu fólki, eða fólki sem á um sárt að binda, óþarfa sársauka eða vanvirðu,“ segir siðanefndin, og kemst síðan að þeirri niðurstöðu, að Ríkisútvarpið og Helgi Seljan hafi brotið 3. grein siðareglna og brotið sé alvarlegt.

• 8 blogg um fréttina

Bloggað um fréttina

• Gestur Guðjónsson: Nornaveiðihugur kosningastjóra Samfylkingarinnar staðfestur
• Ía Jóhannsdóttir: Ansi seint í rassinn gripið!
• G. Tómas Gunnarsson: Rétt og rangt eða rangt og rangt?
• Þarfagreinir: Ja hérna
• Stefán Friðrik Stefánsson: Siðanefnd úrskurðar gegn umfjöllun Kastljóss
• Vilhjálmur Örn Vilhjálmsson: Rugl
• Rúnar Már Bragason: Réttur úrskurður
• Ásthildur Cesil Þórðardóttir: Að mínu mati á að upplýsa um og ræða opinskátt …