Fimm afburðaungmenni halda til Írans á alþjóða-ólympíukeppnina í eðlisfræði

Eftir Arndísi Þórarinsdóttur

arndis@mbl.is

„Þetta er best í heimi," segir Tómas Pálsson, nýstúdent frá Menntaskólanum í Reykjavík, dreyminn á svip þegar hann ræðir um verkefni sumarsins – að framkvæma tilraunir, hlusta á fyrirlestra og leysa dæmi frá morgni til kvölds í tómlegri skólabyggingu á lóð Háskóla Íslands.

Tómas og fjórir félagar hans úr MR verða fulltrúar Íslands í alþjóðlegu ólympíukeppninni í eðlisfræði sem fer fram í Íran í júlí. Fram að brottför eru þeir í stífum þjálfunarbúðum.

Komnir með hausverk kl. þrjú

MR-ingar höfnuðu raunar í efstu átta sætunum í forkeppni sem skar úr um það hverjir yrðu í liðinu. Strákarnir eru sammála um að skýra megi árangur skólans á þessu sviði með því að þar ríki einstakt, hvetjandi andrúmsloft hvað varðar raungreinar. Yfirstjórn skólans sé hlynnt eflingu þeirra, kennararnir séu engum líkir og í skólann flykkist nemendur sem hafi áhuga á námi af þessum toga. Arnar Þór Hallsson og Einar Bjarki Gunnarsson, dúx Menntaskólans nú í vor, segja að iðkun raungreina sé eðlilegur hluti skólalífsins í MR og því fjarri lagi að þeir sem leggi stund á þær séu litnir hornauga af skólafélögum sínum.

Þegar við þetta bætist sex vikna þjálfun skyldi maður halda að piltarnir væru vel í stakk búnir til þess að takast á við þær þrautir sem bíða þeirra í Íran.

Nánar er rætt við ólympíufarana í Morgunblaðinu í dag.