Formúluökumaður sýnir listir sínar við Smáralind

Nico Rosberg, ökumaður Williamsliðsins í Formúlu 1-kappakstrinum, sýndi listir sínar á bílaplaninu við Smáralind í dag. Bíllinn sem hann ók er notaður í tilraunaakstri, og er ennfremur varabíll í keppnum.

Áður en Rosberg settist undir stýri veitti hann aðdáendum sínum á Íslandi eiginhandaráritanir og fjölmiðlum viðtöl.

Næsta keppni sem hann tekur þátt í er í Frakklandi á sunnudaginn, og hann kvaðst bjartsýnn á gengi sitt þar. Liðinu hafi gengið vel upp á síðkastið, og ef hann næði sjötta til sjöunda sæti yrðu það góð úrslit.

Þetta mun vera í fyrsta sinn sem Formúlubíl er ekið hérlendis. Bílnum, sem vegur um 600 kg, fylgir 20 manna starfslið ásamt tæplega 8 tonnum af búnaði.

Baugur Group og Hagkaup standa fyrir komu Rosbergs og bílsins til landsins.

• 3 blogg um fréttina

Bloggað um fréttina

• Jón Þór Bjarnason: Hraðakstur
• Sigfús Sigurþórsson.: Þetta er bara ruslahrúga.
• Hlaupasamtök Lýðveldisins: Óheppileg tímasetning eða hvað?