Humarhátíð á Höfn í Hornafirði

Nú hefur Humarhátíðin á Höfn verið sett með hefðbundnum hætti. Talsvert af gestum er komið í bæinn. Mikill fjöldi var í skrúðsgöngu í kvöld og virðist fólk almennt skemmta sér vel, að sögn lögreglu.

Humarhátíðin á Höfn er ein af þessum hefðbundnu bæjarhátíðum þar sem bæjarbúar, ungir sem aldnir, kappkosta við að sýna gestum sínum menningu og sögu bæjarins með ýmsum hætti. Nafn hátíðarinnar er einmitt fengið af þeirri miklu hefð sem humarveiðar eru frá Höfn, samkvæmt upplýsingum frá lögreglu.

Lögreglan vill brýna fyrir þeim ökumönnum sem eiga leið um A-Skaftafellssýslu að aka með varúð og sýna tillitsemi, en sauðfé getur leynst í vegköntum, og búast má við talsverðri umferð. Sérstaklega er þeim, sem eru með hjólhýsi, fellihýsi, tjaldvagna eða önnur tengitæki í drætti, bent á að aka varlega og sýna tillitsemi.

Lögreglan er með aukið umferðareftirlit og mun vera mjög áberandi á vegunum, vegfarendum til halds og trausts.

• 1 blogg um fréttina

Bloggað um fréttina

• Jenný Anna Baldursdóttir: HUMARDANSINN