Fyrsta íslenska járnkonan

Bryndís Baldursdóttir kláraði Ironman-keppnina í Frankfurt á sunnudaginn, fyrst íslenskra kvenna. Að sögn Bryndísar ákvað hún að taka þátt í keppninni fyrir einu og hálfu ári. Hún byrjaði á því að keppa í hálfri Ironman-keppni í Arizona í Bandaríkjunum í október á síðasta ári. Eftir áramót byrjaði hún á áætlun sem fól í sér æfingar frá 8 klst. á viku upp í 18 klst. en hún tók þrjár æfingar í viku í hverri grein.

Fyrir sjö vikum lenti Bryndís í óhappi sem setti strik í reikninginn. Einn morguninn þegar hún var að hjóla í vinnuna steyptist hún af hjólinu og viðbeinsbrotnaði. "Ég sat og skældi eins og krakki, þetta var svo vont. Ég var ekki mikil járnkona þá." Bryndís segir þetta hafa sett æfingaáætlun hennar úr skorðum en hún var svo ákveðin í að taka þátt í keppninni að það kom einfaldlega ekki til greina að gefast upp.

Bryndís segist hafa verið send heim af spítalanum með hægri höndina í fatla og þau fyrirmæli að vera kyrr í 5-7 daga. Að fimm dögum liðnum stóð hún upp, fór inn í stofu og gerði 500 hnébeygjur og 500 hnélyftur. Nokkrum dögum síðar var hún svo mætt í líkamsræktarsal þó að hún gæti ekki æft jafnmikið og hún þurfti.

Ætlar aftur að ári

Aðspurð segir hún áhyggjurnar af tímamörkunum hafa verið erfiðastar. Sundið gekk vel en Bryndís var fimm mínútum frá tímamörkunum eftir 100 km hjólreiðar. Þá leið henni mjög illa og var að hugsa um að hætta. Í sundinu notaðist Bryndís nánast bara við vinstri höndina en eftir slysið segir hún hægri höndina bara hafa þvælst fyrir sér á æfingum, hún hafi aðeins þjálfað þá vinstri. Meiðslin hafi ekki eyðilagt fyrir henni heldur hægt á henni en hún segist ekki hafa átt von á að klára þetta fyrr en hún var að hlaupa síðustu 10 km.

Bryndís kláraði keppnina á tæpum 15 tímum og 25 mínútum en heildartímamörkin voru 16 klst. Hún segist stefna aftur á keppnina í Frankfurt að ári því hún vill vita hvað hún getur með heila öxl. "Það að fara í þessa keppni bara með annan handlegginn er ekkert svo langt frá lagi. Fólk hefur klárað þessa keppni einhent eða einfætt. Sá elsti sem kláraði heimsmeistaramótið á Hawaii í fyrra undir sautján tímum var 80 ára. Þátttaka í keppninni með viðbeinsbrot er því ekki óraunhæf."

Sjá nánar í Morgunblaðinu í dag.