Vill láta athuga millilandaflug frá Þingeyrarflugvelli

Kristján Þór Júlíusson, þingmaður Sjálfstæðisflokksins í Norðausturkjördæmi og fyrrverandi bæjarstjóri Ísafjarðarbæjar, vill skoða þann möguleika að ríkissjóður stuðli að millilandaflugi með sjávarafurðir frá Akureyri, Egilsstöðum og Þingeyri.

Kristján segir að það þurfi að gefa fyrirtækjum í sjávarútvegi kost á að koma afurðum sínum á markaði án þess að þeim sé öllum keyrt til Keflavíkur.

„Þetta mun lækka kostnað fyrirtækjanna og létta á vegakerfinu. Það er grundvallaratriði í því sem er að koma upp með þorskstofninn núna að við gerum sem mest verðmæti úr afurðunum og útflutningur á ferskum flökum er eitt af því“, segir Kristján.

Hann segist ekki þekkja til tæknilegra hliða mála en segir að millilandaflugvélar sem taka á loft frá Akureyri þurfi að millilenda á Egilsstöðum. „Brautin á Akureyri er of stutt og vélarnar geta ekki tekið á loft með fulla tanka af bensíni. Því þarf að lenda á Egilsstöðum og taka meira bensín, þetta er aukakostnaður sem fyrirtækin bera.“

Kristján hefur heyrt af umræðu um millilandaflug frá Þingeyri og segir nauðsynlegt að skoða það með opnum huga.

• 1 blogg um fréttina

Bloggað um fréttina

• Þorsteinn Gunnarsson: Flugvöll í framhjáhlaupi...