Krefur Alcan á Íslandi svara um söfnun persónuupplýsinga

Pétur Óskarsson, forsvarsmaður samtakanna Sólar í Straumi hefur sent forstjóra Alcan á Íslandi bréf þar sem óskað er svara við spurningum um söfnun persónuupplýsinga í aðdraganda íbúakosninga í Hafnarfirði í vor. Segir Pétur að m.a. þurfi að fást svör við því af hverju starfsmenn Alcan áttu að safna persónuupplýsingum um meðlimi Sólar í Straumi og til hvers átti að nota þessar upplýsingar.

Þetta kemur fram í eftirfarandi yfirlýsingu, sem Pétur skrifar undir:

Í inngangi að úrskurði Persónuverndar frá 2. júlí sl. um ábyrgð Alcan á Íslandi hf. á söfnun persónuupplýsinga í aðdraganda íbúakosninganna um stækkun álversins í Straumsvík kemur fram að fyrirtækið lagði að starfsmönnum sínum að safna sérstaklega upplýsingum um meðlimi Sólar í Straumi og skrá í miðlægan gagnagrunn (heimild: Úrskurður Persónuverndar nr. 2007/258, www.personuvernd.is).

Þann 14. mars 2007 sendu fulltrúar í stjórn Sólar í Straumi formlega fyrirspurn til Rannveigar Rist forstjóra Alcan á Íslandi hf. á grundvelli laga um persónuvernd þar sem m.a. var farið fram á að stjórnin yrði upplýst um hvort að skráðar hafi verið persónuupplýsingar um einstaka stjórnarmeðlimi. Samkvæmt 18 gr. laga um persónuvernd nr. 77/2000 eiga einstaklingar skýran rétt á því að fá að vita hvaða persónuupplýsingar ábyrgðaraðili hefur skráð. Fyrirspurn okkar hefur til dagsins í dag ekki verið svarað.

Forstjóri Alcan á Íslandi þarf að gera hreint fyrir sínum dyrum og svara eftirfarandi spurningum:

• Af hverju áttu starfsmenn Alcan að safna persónuupplýsingum um meðlimi Sólar í Straumi?
• Til hvers átti að nota þessar upplýsingar?
• Voru einhverjar upplýsingar skráðar um meðlimi hópsins og ef svo er, hvaða upplýsingar voru þetta, hver hafði aðgang að þeim og hvernig voru þær notaðar?
Það er ljóst í dag að Alcan á Íslandi ber fulla ábyrgð í þessu máli. Svo virðist sem fyrirtækið hafi farið langt út fyrir velsæmismörk í aðdraganda kosninganna. Sú aðferð fyrirtækisins að hindra aðgang Persónuverndar að nauðsynlegum gögnum (sjá úrskurð Persónuverndar 2007/258, kafli II, málsgrein 3) bendir til þess að hér hafi verið um yfirvegaða áætlun að ræða en ekki mistök vegna vanþekkingar.

Fyrir Hafnfirðinga, meðlimi Sólar í Straumi og íbúa þeirra sveitarfélaga sem boðið hafa Alcan lóð undir starfsemi sína er mikilvægt að öll spilin verði lögð á borðið á næstu dögum. Friðhelgi einkalífs er eitt af verðmætustu gildum okkar samfélags. Fyrirtæki og einstaklingar sem þeim stjórna eiga ekki að komast upp með að svívirða grunngildi okkar samfélags átölulaust.

• 1 blogg um fréttina

Bloggað um fréttina

• Valgerður Halldórsdóttir: Til hvers átti að nota upplýsingarnar?