Ferðafólki bjargað heilu á höldnu í Þórsmörk

Björgunarsveitir Slysavarnafélagsins Landsbjargar eru nú á leið í skála með 11 ferðamenn sem lentu í sjálfheldu í Þórsmörk. Hópurinn hafði gengið yfir Fimmvörðuháls og tók vinstri beygju af Morinsheiði, sem leið lá niður í Hvannárgil. Þegar fólkið var komið sunnarlega í Útgönguhöfða lenti það í sjálfheldu og komst hvorki lönd né strönd. Fararstjóri hópsins komst við illan leik af höfðanum þar sem hann komst í símasamband og gat hringt í Neyðarlínuna.

Gönguhópar úr björgunarsveitum á Hellu og Hvolsvelli fóru á staðinn ásamt félögum björgunarsveita sem eru í hálendisgæslu á vegum Slysavarnafélagsins Landsbjargar. Komust þeir að fólkinu klukkan rúmlega níu í kvöld. Ferðafólkið er allt heilt á húfi og á leið í skála eins og fyrr segir.

Þyrla Landhelgisgæslunnar var send á svæðið en gat illa athafnað sig þar sem lágskýjað er í Þórsmörk í kvöld. Hún gat þó sveimað yfir og aðstoðaði björgunarsveitarfólk við að áætla staðsetningu hópsins, samkvæmt upplýsingum frá Landsbjörgu.

• 4 blogg um fréttina

Bloggað um fréttina

• Magnús Jónsson: Vel gert Landsbjörg
• Anna Sigríður Guðmundsdóttir: Hvar ert þú ?
• S i g u r ð u r S i g u r ð a r s o n: Teljast öll útköll björgunarsveita fréttir?
• Kjartan Pétur Sigurðsson: Hér koma svo myndir af umræddu svæði - Fimmvörðuháls