Heimsmeistaramót íslenska hestsins hafið

Eftir Eyþór Árnason í Hollandi
Heimsmeistaramót íslenska hestsins var sett í morgun í Hollandi. Mótið fer rólega af stað en það eina sem var á dagskrá í dag var byggingadómur kynbótahrossa sem hefur verið gert óvenju hátt undir höfði. Dómarnir fara fram í tjaldi þar sem hestarnir eru sýndir á sviði sem minnir einna helst á svið sem notuð eru við tískusýningar.

Hollendingum hefur tekist sérlega vel upp með mótsvæðið sem er eins og best verður á kosið og aðstaða er góð fyrir hesta og menn. Umgjörð keppnisvallarins er mjög glæsileg og eru knaparnir mjög ánægðir með brautina sjálfa.

Íslenska landsliðið æfði í dag og var landsliðseinvaldurinn, Sigurður Sæmundsson, mjög sáttur að lokinni æfingu. Í stuttu samtali við blaðamann mbl.is sagði hann liðið vera við hestaheilsu, nú væri verið að vinna í sýningum knapanna og að allt liti mjög vel út.

Á morgun munu fara fram hæfileikadómar kynbótahrossa.