Nýting flaka er mismunandi eftir veiðisvæðum

Nýting flaks af þorski, sem er veiddur út af Suðausturlandi, er betri en af þorski sem er veiddur út af Norðurlandi. Þá er flakanýting betri á tímabilinu júní til ágúst miðað við aðra ársfjórðunga, að því er fram kemur í nýrri rannsókn Matís.

Í rannsókninni, sem er samstarfsverkefni Matís og Fisk Seafood, er að finna niðurstöður rannsókna á því hvernig þorskur, sem veiddur var á mismunandi veiðisvæðum og á ólíkum árstíma, nýtist sem hráefni við vinnslu og verkun léttsaltaðra þorskafurða, en sú afurð hefur átt vaxandi vinsældum að fagna á mörkuðum í S-Evrópu á undanförnum árum.

Í rannsókninni voru skoðaðir þættir eins og aldur hráefnis frá veiði, los, mar, holdafar og og fleira sem getur tengst árstíðabundnum sveiflum í ástandi hráefnisins og veiðisvæðum ásamt veiðiaðferðum og meðhöndlun afla frá veiði til vinnslu.

Haft er eftir Sigurjóni Aransyni, sérfræðingi hjá Matís, í tilkynningu að fram hafi komið vísbendingar um mismunandi eiginleika þorsks á mismunandi veiðisvæðum og árstímum. Helstu niðurstöður hafi verið þær, að veiðisvæði út af Suðausturlandi gáfu marktækt betri flakanýtingu í þorski en veiðisvæði út af Norðurlandi, auk þess sem flakanýting var betri á tímabilinu júní-ágúst, miðað við aðra ársfjórðunga.

Verkefnið var styrkt af AVS rannsóknarsjóði í sjávarútvegi.

• 1 blogg um fréttina

Bloggað um fréttina

• Hallgrímur Guðmundsson: Hvenær skildi koma að því....