Voru uppi í rúmum og sófum

Eftir Andra Karl andrikarl@mbl.is
„Vart er hægt að ímynda sér hversu illa öllum líður yfir því að hafa svona fólk hérna inni. Það hefur verið uppi í rúmum, sófum auk þess sem búið var að færa til húsgögn og fara í alla skápa,“ segir heimilisfaðir í Garðabænum sem kom að einbýlishúsi sínu í rúst eftir tveggja vikna fjölskylduferð til Spánar. Svo virðist sem óprúttnir aðilar hafi dvalið um stund í húsinu, auk þess að hafa á brott með sér fjölda verðmæta, þ.m.t. þrjár tölvur, flatskjá, heimabíó og skartgripi.

Tengdafaðir heimilisföðurins kom að húsinu í gærkvöldi og kallaði þegar til lögreglu. Heimilisfaðirinn, sem ekki vill láta nafn síns getið, og fjölskylda hans komu til landsins í nótt. Hann segir hvorki hægt að sjá á ummerkjum hversu margir hafi verið að verki né hvenær brotist var inn. Nágrannar hafi þó ekki tekið eftir neinum mannaferðum.

Heimilisfaðirinn segir erfitt að lýsa því hvernig er að koma að húsi sínu í slíku ásigkomulagi. „Það er bara óhugurinn; að vita af svona fólki, því þau dvelja hérna í einhvern tíma og eru greinilega ekki að flýta sér. Víst er að þau voru svona róleg, hlutu þau að hafa vitneskju um ferðalagið.“

Fjölskyldan vildi ekki gista í húsinu sl. nótt og óvíst er hvort hún verður þar í nótt. Segir fólkið að það taki eflaust langan tíma að jafna sig á þessu atviki.