Innlent | mbl | 1.9.2007 | 16:00

Moggabloggið tilnefnt til alþjóðlegra vefverðlauna

Bloggvefur mbl.is er meðal þeirra verkefna, sem tilnefnd hafa verið af Íslands hálfu í vef- og margmiðlunarkeppnina World Summit Award, sem fer fram á tveggja ára fresti á vegum Sameinuðu þjóðanna. Alls eru tilnefnd verkefni í átta flokka og var Moggabloggið tilnefnt í flokki efnis, sem stuðlar að því að brúa bil milli menningarheima.

Íslensku tilnefningarnar voru eftirtaldar:

Menntun (eLearning): www1.nams.is/fuglar/ - Námsgagnastofnun og Jóhann Óli Hilmarsson

Menning (eCulture): www.menningarnott.is - Reykjavíkurborg og Gagarín ehf.

Vísindi (eScience): www.islendingabok.is - Íslensk erfðagreining ehf og Friðrik Skúlason ehf.

Opinber stjórnsýsla (eGovernment): Rafræn skilríki- Fjármálaráðuneytið og Samtök banka og verðbréfafyrirtækja (SBV)

Heilsa (eHealth): www.heilsugaeslan.is - Heilsugæsla höfuðborgarsvæðisins og Gagarín ehf.

Viðskipti (eBusiness): www.ja.is - Já upplýsingaveitur ehf

Afþreying (eEntertainment):www.lazytown.com - LazyTown Entertainment

Efni sem stuðlar að því að brúa bil milli menningarheima (eInclusion): www.mbl.is/mm/blog/ - Morgunblaðið-Árvakur.

Settur var á fót hópur sem valdi verkefnin sem tilnefnd eru frá Íslandi. Hópinn skipuðu Sigfús Þ. Sigmundsson, forsætisráðuneyti, Hrafnhildur Tryggvadóttir, menntamálaráðuneyti, Guðmundur Ásmundsson og Haraldur D. Nelson frá Samtökum Iðnaðarins.

Á árinu 2005 var fyrirtækið, 3-plus, sem framleiðir leiktækið DVD-Kids fyrir börn, einn af 40 vinningshöfunum í keppninni.