Innlent | mbl | 6.9.2007 | 11:05

Tilefni til að ætla að verðlagsáhrif gengislækkunar verði hófleg

Davíð Oddsson, seðlabankastjóri. mbl.is/Ómar

Davíð Oddsson, seðlabankastjóri, segir að styrking krónunnar fyrr á árinu hafi ekki skilað sér að fullu í lægra vöruverði. Það gefi tilefni til að ætla. að verðlagsáhrif lækkunar gengisins að undanförnu verði hóflegri en ella.

Davíð gerði í dag grein fyrir forsendum þeirrar ákvörðunar stjórnenda Seðlabankans í dag, að halda stýrivöxtum bankans óbreyttum. Sagði hann, að verðbólguspá sem birtist í Peningamálum í júlí sl. hafi bent til þess að ekki yrði unnt að lækka stýrivexti fyrr en á fyrri helmingi næsta árs. Að mati bankastjórnar sé ekki tilefni til að hvika frá því mati að svo stöddu.

Davíð sagði, að nokkur gengisórói hefði verið að undanförnu og verðbólguhorfur til skamms tíma heldur lakari nú en við síðustu vaxtaákvörðun. Til lengri tíma hafa þær hins vegar lítið breyst. Gengisþróun sé nú mjög óviss og muni ekki síst ráðast af framvindu á alþjóðlegum fjármálamörkuðum. Gengi krónunnar hafi í seinni tíð breyst mjög svipað og gengi annarra hávaxtagjaldmiðla, svo sem gjaldmiðla Nýja-Sjálands og Ástralíu.

Davðið sagði, að verðbólga hefði hjaðnað eins og gert hafi ráð fyrir í seinustu spá bankans. Við síðustu mælingu hafði vísitala neysluverðs hækkað um 3,4% á tólf mánuðum en áætluð undirliggjandi verðbólga var talin vera nærri 6%. Ætla megi, að spá um verðbólgu á þriðja ársfjórðungi haldi en að hún verði heldur meiri á næstu fjórðungum en spáð var þar sem gengi krónunnar verði lítið eitt lægra en þá var byggt á.

Þá sagði Davíð, að vísbendingar sýni að innlend eftirspurn sé enn kröftug. Enn sé mikil spenna á vinnumarkaði, velta vaxi ört, mikil eftirspurn sé eftir fasteignum og útlánavöxtur hafi aukist. Á hinn bóginn hafi sviptingar á fjármálamörkuðum leitt til þess að lánskjör fjármálafyrirtækja hafa almennt versnað og þeirra áhrifa gætir í útlánakjörum. Einnig er líklegt að óróinn á fjármálamörkuðum muni draga nokkuð úr óraunsærri bjartsýni um efnahagshorfur, sem ýtt hafi undir eftirspurn á undanförnum misserum.

„Hvort tveggja styður við aðhaldsstefnu Seðlabankans. Skerðing aflamarks var einnig nokkru meiri en miðað var við í spá Seðlabankans í júlí. Áhrif skerðingarinnar munu ekki koma fram að fullu fyrr en nokkuð verður liðið á næsta ár," sagði Davíð.

Hann sagði að bankastjórn Seðlabankans stefni sem fyrr að því að ná verðbólgumarkmiðinu innan viðunandi tíma. Ákvörðun bankastjórnar nú taki mið af verðbólguspánni sem kynnt var í júlí sl. og fól í sér að verðbólga yrði nærri markmiði frá miðju næsta ári. Versni verðbólguhorfur muni bankastjórn bregðast við. Hið sama gildi ef horfur batna frá því sem spáð var.