Sigríður Lillý Baldursdóttir nýr forstjóri TR

Karl Steinar Guðnason, forstjóri Tryggingastofnunar ríkisins, lætur af störfum 1. nóvember og tekur Sigríður Lillý Baldursdóttir, framkvæmdastjóri þróunarsviðs Tryggingastofnunar, við starfinu.

Karl Steinar hefur verið forstjóri Tryggingastofnunar í 14 ár eða frá 1. október 1993. Hann hugðist láta af störfum vegna aldurs nú á haustdögum en það varð að samkomulag að starfslok hans yrðu 1. nóvember, að því er kemur fram í tilkynningu frá heilbrigðisráðuneytinu.

Sigríður Lillý Baldursdóttir hefur starfað sem framkvæmdastjóri þróunarsviðs Tryggingastofnunar undanfarin ár. 1996-2001 var hún skrifstofustjóri í félagsmálaráðuneytinu, verkefnisstjóri í utanríkisráðuneytinu árin 1994-1996 en fram til þess tíma var hún lektor við Tækniskóla Íslands og stundakennari við Háskóla Íslands. Hún sat í Tryggingaráði frá 1987-1995. Sigríður Lillý er eðlisfræðingur að mennt og hefur stundað rannsóknir í endurhæfingarverkfræði.

• 1 blogg um fréttina

Bloggað um fréttina

• Stefán Friðrik Stefánsson: Sigríður Lillý tekur við af Karli Steinari