„Óraunhæft að áætla tvo tíma í flutning hússins"

Eftir Sigrúnu Birnu Birnisdóttur
Ragnar Þórarinsson, meðstjórnandi SR-verktaka sem sjá um flutning þriggja hæða húss frá Hverfisgötu að Bergstaðastræti, segir að í raun hafi verið óraunhæft að gera ráð fyrir því að flutningur þetta hárrar og þungrar byggingar tæki ekki nema tvo tíma við þær aðstæður sem séu í miðbænum þar sem götur séu þröngar og mikið um mishæðir í götunum. Flutningurinn hefði þó sennilega ekki tekið nema tvo tíma hefðu misfellurnar í götum og það hversu kúptar þær eru ekki komið til.

Húsið er nú komið á áfangastað en verður ekki sett á grunn fyrr en síðdegis.

Ragnar sagði í samtali við blaðamann mbl.is í morgun að mishæðirnar hafi valdið því að húsið hafi vaggað mjög mikið og að menn hafi heldur viljað fara að öllu með gát en að flýta sér um of. Því hafi vagnar verið settir undir húsið í beygjum og annað eftir því sem hafi tekið sinn tíma. Þá segir hann að um tuttugu manns á vegum fyrirtækisins, lögreglunnar og Framkvæmdasýslunnar hafi unnið að flutningi hússins á vettvangi í nótt.

Húsið er nú komið á áfangastað við Bergstaðastræti og stendur til að setja það á grunn, sem bíður þess, síðdegis í dag. Verður horn Spítalastígs og Bergstaðastrætis lokað þar til húsið verður komið á grunninn.