Lögregluaðgerðum að mestu lokið í Fáskrúðsfirði

Nú eftir hádegið var að færast kyrrð yfir höfnina á Fáskrúðsfirði og virðist sem hin umfangsmikla lögregluaðgerð, sem staðið hefur yfir síðan snemma í morgun vegna fíkniefnafundar í skútu í höfninni, sé að mestu í rénum. Upplýst var í dag, að tugir kílóa af fíkniefnum hefðu fundist í skútunni í morgun.

Lögregla er nýfarin af staðnum með fíkniefnahund sem notaður var til að leita að efnum í skútunni og sömuleiðis virðist leit kafara í firðinum vera búin. Varðskip Landhelgisgæslunnar liggur við hafnarbakkann og er þar lögregluvakt um borð.

Fram kom hjá Stefáni Eiríkssyni, lögreglustjóra á höfuðborgarsvæðinu, á blaðamannafundi í dag, að sennilega væri um að ræða mesta magn fíkniefna í einu máli hérlendis. Umfangsmesta málið til þessa kom upp á síðasta ári þegar reynt var að smygla á þriðja tug kílóa af amfetamíni og hassi í bensíntanki bíls frá Hollandi. Fjórir menn voru í héraðsdómi dæmdir í 4-8½ árs fangelsi fyrir það.

• 5 blogg um fréttina

Bloggað um fréttina

• Magnús Geir Guðmundsson: Af hógværð skildu menn hæla sér!
• Oddgeir Einarsson: Nú aukast innbrot og vændi
• Gunnar Th. Gunnarsson: Mun engu breyta
• Einar Vignir Einarsson: Svona á að gera hlutina.
• Einar Lee: Svona á að gera þetta