Farþegar á skemmtiferðaskipum eyða 400 milljónum

Síðasta skemmtiferðaskip sumarsins, Black Watch, fór lagði úr Reykjavíkurhöfn á föstudag. Það var í minni kantinum, ef hægt er að segja svo um risavaxin skip, og um borð eru um 800 farþegar. Þeir eru á langri siglingu, eru nú á leið til Ameríku og tekur ferðalag þeirra samanlagt um mánuð. Farþegarnir eru velflestir eldri borgarar.

Samkvæmt könnun Faxaflóahafna eyddu farþegar skemmtiferðaskipa sem hingað komu sl. sumar 6.700 krónum hér á landi að meðaltali. Það þýðir að þeir 55 þúsund farþegar sem komu hér í land síðasta sumar eyddu tæplega 370 milljónum króna í heimsókn sinni og eyði farþegar nú í sumar jafnmiklu hafa þeir eytt hér rúmlega 400 milljónum.

Farþegar með skemmtiferðaskipum eru ekki taldir með í tölum um ferðamenn á Íslandi og það er hvergi gert í heiminum. Í fyrra komu hingað til lands í gegnum Leifsstöð rúmlega 400 þúsund farþegar og sé farþegum skemmtiferðaskipa bætt við þá tölu voru ferðamenn sem hingað komu því rúmlega 450 þúsund talsins.

„Skipin hafa verið fullbókuð í sumar," segir Ágúst Ágústsson, markaðsstjóri Faxaflóahafna.

Sífellt fleiri skip liggja við bryggju í Reykjavík yfir nótt. Það þýðir að farþegarnir fara meira í land og eyða hér meiri peningum. Þá koma hingað einnig æ yngri farþegar.