Krefjast þess að íslenskur sendifulltrúi verði kallaður heim

Yfirvöld á Sri Lanka hafa krafist þess að Bjarni Vestmann, sendifulltrúi íslenska utanríkisráðuneytisins, verði kallaður heim frá Sri Lanka eftir að hann heimsótti yfirráðasvæði tamílsku Tígranna á norðanverðri eyjunni og átti fund með S. P. Thamilselvan, einum helsta leiðtoga þeirra.

Samkvæmt heimildum AFP fréttastofunnar hefur utanríkisráðuneyti Sri Lanka farið fram á það við íslensk yfirvöld að Bjarni verði kallaður heim. Þá segir í frétt AFP að Bjarni hafi komið til Sri Lanka með ferðamannaáritun og fengið far með eftirlitsmönnum SLMM yfir á yfirráðasvæði Tígranna.

„Ráðherrann fordæmdi algerlega framkomu herra Vestmann og krafðist þess að hann yrði kallaður heim,” segir í yfirlýsingu utanríkisráðuneytis Sri lanka vegna málsins. Þá segir að einnig hafi verið kvartað við SLMM yfir því að Bjarni skuli hafa verið fluttur í leyfisleysi yfir á yfirráðasvæði Tígranna.

Útlendingum og fréttamönnum er ekki heimilt að heimsækja yfirráðasvæði Tígranna á Sri Lanka nema með sérstöku leyfi yfirvalda á Sri Lanka.

Fréttin á vef tamílsku Tígranna

• 1 blogg um fréttina

Bloggað um fréttina

• Bogi Jónsson: Í vinnu á ferðamannaáritun