Innlent | 24 stundir | 17.10.2007 | 6:15

Dýrasti lúxusbíllinn á 200 milljónir

Fjölmargir lúxusbílar, allt að 200 milljóna króna virði, eru á söluskrám íslenskra bílasala.

"Eftirspurnin eykst stöðugt," segir G. Birnir Ásgeirsson, bílasali hjá bílasölunni Bíll.is, aðspurður um eftirspurnina eftir bílum sem kosta meira en 20 milljónir. "Það hefur gerst á síðustu tveimur árum." Meðal bíla á íslenskum söluskrám er Bugatti Veron, sem er einn dýrasti sportbíll í heimi og í algjörum sérflokki hvað varðar verð. Hann er verðlagður á rúmar 200 milljónir hjá bílasölunni Sparibíl. Þá er Lamborghini Gallardo á skrá hjá Bílahorninu á tæpar 20 milljónir og Bíll.is býður upp á Bentley Continental á rúmar 20 milljónir. "Ég er búinn að fá margar fyrirspurnir um þennan bíl," segir G. Birnir um þann síðastnefnda og bætir við að fyrir liggi tilboð í bílinn.