Veðravíti við Ísland

Flest verstu óveðrin á Norður-Atlantshafi síðastliðin fimm ár urðu í kringum Ísland, að því er athugun norskra nemenda Haraldar Ólafssonar prófessors í veðurfræði leiddi í ljós.

Nemendurnir könnuðu gögn úr gervitunglum sem mæla vindhraða yfir hafinu. Sýndu þau að fárviðrin, þegar vindur er yfir 40 m/s, verða helst milli Íslands og Grænlands og fyrir sunnan og austan Ísland.

Fárviðrin urðu helst að vetrarlagi, það er á tímabilinu frá október og fram í mars.

Í vetur er ætlunin að rannsaka nánar óveður í Norðurhöfum og verður flogið út í þau frá Norður-Noregi.