Óábyrgt að halda áfram með Bitruvirkjun

Bæjarstjórn Hveragerðisbæjar leggst eindregið gegn Bitruvirkjun, fyrirhugaða gufuaflsvirkjun á Hellisheiði. Segist bæjarstjórnin telja afar óábyrgt af sveitarfélaginu Ölfusi og Orkuveitu Reykjavíkur, að halda áfram með framkvæmd þar sem jafn mikil óvissa ríki um áhrif á loft, vatnslindir og náttúru og hér um ræði.

Bæjarstjórn Hveragerðis samþykkti ályktun á fundi í síðustu viku þar sem lagst er eindregið gegn áformum um byggingu Bitruvirkjunar. Segist bæjarstjórnin telja rétt, að leitað verði annarra leiða til orkuöflunar áður en ráðist sé í framkvæmdir á jafn viðkvæmu svæði.

„Svæðið norður af Hveragerði býr yfir einstakri fegurð og í raun er það ein best varðveitta náttúruperlan í nágrenni höfuðborgarsvæðisins.  Svæðið sem er á náttúruminjaskrá er vinsæll áfangastaður erlendra sem innlendra ferðamanna og hafa vinsældir þess aukist stöðugt undanfarin ár.   Allar framkvæmdir á svæðinu draga úr gildi þess sem útivistarsvæðis fyrir þá sem vilja njóta óspilltrar náttúru.  Í frummatsskýrslu framkvæmdaaðila kemur fram að áhrif vegna framkvæmdarinnar geta orðið veruleg í Hveragerði sem er næsti þéttbýlisstaður við virkjunina í aðeins 4,5 km fjarlægð," segir m.a. í ályktuninni.

• 6 blogg um fréttina

Bloggað um fréttina

• Helgi Már Barðason: Ábyrgðarlaust
• Ómar Ragnarsson: EKKI SEINNA VÆNNA.
• Soffía Sigurðardóttir: Þeir sem hafa komið á staðinn
• Guðmundur Ragnar Björnsson: Hvenær rís hinn þögli meirihluti upp gegn gjömmurunum?
• Dofri Hermannsson: Að éta gæðingana
• Björn Barkarson: Styrr um Bitru