Netvæðing veggjakrotsins

„Netið skýrir að einhverju leyti aukningu á veggjakroti. Það er alveg ljóst," segir Einar Ásbjörnsson, svæðisstjóri lögreglunnar á höfuðborgarsvæðinu í Grafarvogi. Veggjakrotsmál sem komu til kasta lögreglunnar á höfuðborgarsvæðinu voru rúmlega tvöfalt fleiri á fyrstu tíu mánuðum árins 2007 en allt árið 2006. Flest slík mál komu upp í Grafarvogi.

Einar segir spennuna við verknaðinn skipta miklu máli hjá mörgum sem leggi stund á veggjakrot. „Það er ákveðin spenna fólgin í að laumast við þetta. Svo eru þessir strákar að setja myndir af þessu inn á netið, undir dulnefnum, sem eykur enn á spennuna," segir Einar sem telur netið skýra að hluta þá aukningu sem orðið hefur á veggjakroti á höfuðborgarsvæðinu.

Þegar tölur frá lögreglunni á höfuðborgarsvæðinu eru skoðaðar kemur fram að karlar eru í miklum meirihluta þeirra sem höfð eru afskipti af vegna veggjakrots, eða 9 af hverjum 10. Tölurnar sýna að þeir sem höfð eru afskipti af vegna veggjakrots eru allt frá 11 ára og yfir fimmtugt. Flestir eru þó 15 til 19 ára.

• 3 blogg um fréttina

Bloggað um fréttina

• Ellý: Graffiti.
• Púkinn: Veggjakrotsræflarnir
• Stefán Þór Steindórsson: Veggjakrots gagnagrunnur á íslandi