Óveruleg fjölgun hjúkrunarfræðinga þrátt fyrir aukna þörf

Óverulegar breytingar hafa orðið á fjölda hjúkrunarfólks á Landspítala háskólasjúkrahúsi (LSH) undanfarin þrjú ár, þrátt fyrir að hjúkrunarþörf á spítalanum hafi aukist umtalsvert á tímabilinu vegna aukinnar starfsemi á mörgum sviðum. Þessu hefur verið mætt með aukinni yfirvinnu að einhverju leyti, auk þess sem vinnuálag hefur aukist, einkum á legudeildum spítalans, en mannafli hefur flust þaðan á aðrar deildir.

Þetta er meðal þess sem kemur fram í úttekt á mönnun hjúkrunar á LSH, sem unnin er af verkefnisstjórum á hag- og upplýsingasviði spítalans. 

Starfsmannavelta hjá hjúkrunarfræðingum á LSH var 10% á árinu 2006, en þar af hætti hluti vegna aldurs. Aukavöktum hefur fjölgað um 15 stöðugildi milli ára og setnum stöðugildum fækkaði um 20 árið 2006 frá árinu áður.