Ólafur Ragnar í opinbera heimsókn til Katar
Setja bókamerki
Ólafur Ragnar Grímsson, forseti Íslands, fer í opinbera heimsókn til Katar dagana 22.-25. janúar. Er það í fyrsta sinn sem forseti Íslands fer í opinbera heimsókn til ríkis í Arabaheiminum, samkvæmt upplýsingum frá skrifstofu forseta Íslands.
Á dagskrá heimsóknarinnar eru viðræðufundir með þjóðarleiðtoga Katar Hamad Bin Khalifa Al Thani og öðrum forystumönnum landsins og þátttaka í samræðum um tækifæri smárra ríkja í hagkerfi 21. aldar.
Þá munu Ólafur Ragnar og íslensk viðskiptasendinefnd hitta fulltrúa fyrirtækja í Katar en Útflutningsráð hefur annast undirbúning þeirra funda. Ólafur Ragnar mun auk þess taka þátt í hádegisverði í boði Kaupþings og heimsækja skrifstofur bankans. Þá mun hann kynna sér starfsemi sjónvarpsstöðvarinnar Al Jazeera.
Í för með Ólafi Ragnari eru Össur Skarphéðinsson, iðnaðarráðherra, embættismenn frá iðnaðarráðuneyti, utanríkisráðuneyti og forsetaembættinu og fjölmargir fulltrúar íslenskra fyrirtækja.
Ólafur Ragnar mun áður taka þátt í heimsráðstefnu um framtíð orkumála, World Future Energy Summit, sem haldin er í Abu Dhabi í Sameinuðu arabísku furstadæmunum 20.-22. janúar.
Hann mun flytja ræðu á opnunarfundi ráðstefnunnar og tekur þátt í umræðum. Össur flytur einnig ræðu á ráðstefnunni.
Þá situr Ólafur Ragnar, ásamt Ismail Omar Guelleh, forseta Djíbútís, sérstakan kynningarfund sem haldinn verður í Abu Dhabi um jarðhitasamvinnu Íslands og Djíbútís. Lagður var grundvöllur að þeirri samvinnu í heimsókn forseta Djíbútís til Íslands í febrúar í fyrra. Við það tækifæri var undirritaður samningur Orkuveitu Reykjavíkur við stjórnvöld í Djíbútí um rannsóknir og nýtingu jarðhita.
Hópur fólks reyndi að komast að eldgosinu
Sjötti ferðamaðurinn er látinn
Flestir sem hvergi finnast koma frá Sómalíu
Dregið úr gosóróa
„Höfum sloppið bærilega með skaða af þessu gosi“
50 milljónir eiga að minnka svindl um 1 milljarð
Reiðubúin að aflýsa verkföllum í fjórum leikskólum