Undrandi á fjölmiðlaumræðu um fatakaup

 Stjórn Félags ungra Framsóknarmanna á Akureyri og nágrenni lýsir yfir mikilli undrun á framgöngu fjölmiðla í hinu svokallaða fatakaupamáli, þar sem keypt voru föt fyrir frambjóðendur Framsóknarflokksins í Reykjavík í síðustu sveitarstjórnarkosningum.

„Málið hefur allt verið blásið upp og virðist það vera einbeittur vilji fjölmiðla að koma höggi á Framsóknarflokkinn. Hreinni furðu hlýtur að sæta að slíkt mál fái þvílíka umfjöllun í aðalfréttatímum sjónvarpsstöðvanna, jafnvel álíka mikla umfjöllun og myndun nýs meirihluta í borgarstjórn Reykjavíkur.

Málið er minniháttar og ein milljón í kosningabaráttu sem kostar tugi milljóna getur varla verið verð slíkrar umfjöllunar. Fatnaðurinn sem um ræðir var notaður í þágu flokksins enda tíðkast í kosningabaráttu að frambjóðendur komi vel fyrir.

Algengt er orðið að stílistar komi við sögu í kosningum og má telja víst að slík þjónusta sé greidd úr kosningasjóðum flokkanna ásamt t.d. kynningarefni efstu manna á listum. Hver er munurinn á því hvort um er að ræða stílista, kynningarefni eða fatnað?

Í öllum tilfellum er tilgangurinn að skapa góða ímynd frambjóðenda. Það skiptir einfaldlega ekki máli í hvað kosningasjóðir fara svo lengi sem fjármunirnir eru nýttir í þágu viðkomandi flokks í aðdraganda kosninga, að því er segir í ályktun stjórnar Félags ungra Framsóknarmanna á Akureyri og nágrenni.

• 3 blogg um fréttina

Bloggað um fréttina

• Soffía Sigurðardóttir: Svona verður frambjóðandi til
• Örvar Már Marteinsson: Framtíðarfyrirkomulag?
• Magnús Helgi Björgvinsson: Ágæta Unga Framsóknarfólk! Smá skýring