Fóru yfir stöðu mála

„Þetta er náttúrlega alvarlegt ástand og heilmikið áfall þessar uppsagnir og við gerum okkur grein fyrir því,“ sagði Einar K. Guðfinnsson sjávarútvegsráðherra eftir fund með bæjarstjórn Akraness í gærkvöldi. Hann sagðist ekki fyrirfram hafa búist við niðurstöðu af fundinum, sem hefði fremur verið til að fara yfir stöðu mála.

Einar sagði að farið hefði verið yfir upplýsingar frá bæjaryfirvöldum á Akranesi, fulltrúum HB Granda og Verkalýðsfélagi Akraness. „Það er eðlilegt að menn horfi á þetta alvarlegum augum, ekki síst þar sem um er að ræða uppsagnir hjá mjög gamalgrónu fyrirtæki sem gegnt hefur stóru hlutverki í uppbyggingu Akraness.“