FL Group segir að ekkert hafi verið athugavert við aðkomu FL Group eða Geysis Green Energy í samningaviðræðum við Reykjavik Energy Invest og Orkuveitu Reykjavikur eins og gefið sé til kynna í skýrslu stýrihóps Svandísar Svavarsdóttur. FL Group sé stærsti hluthafinn í Geysi með 43% eignarhlut og þrír starfsmenn félagsins eigi sæti í sjö manna stjórn Geysis.

„Markmið samrunans var að mynda leiðandi félag á heimsvísu á sviði jarðvarma þar sem Orkuveita Reykjavíkur yrði stærsti hluthafinn með um 36% eignarhlut og hlutur FL Group um 27%. Framlag FL Group til samrunans var eignarhlutur félagsins í Geysi, auk þess sem félagið hugðist leggja inn um 6 milljarða króna í reiðufé. Framlag Orkuveitunnar var einungis í formi eignarhluts í REI en þar hafði umræddur þjónustusamningur gengt lykilhlutverki í mati á þeim verðmætum. Það er því ljóst að samrunaviðræður, gerð þjónustusamnings og annarra skjala var nátengt og fléttaðist saman í viðræðum á milli REI og Geysis.

Ljóst er að um umtalsverð verðmæti var að ræða sem Orkuveitan vildi fá viðurkennd sem eignarhlut inn í sameinaðu félagi. Í ljósi þess er ekkert annað en eðlilegt að það mál væri skoðað gaumgæfilega af samningsaðilum og FL Group geti í því ljósi þess ekki talist utanaðkomandi aðili í þessu máli," segir í yfirlýsingu frá FL Group.