Gagnlegur fundur um málefni læknaritara

Ögmundur Jónasson, formaður BSRB, segir fund fulltrúa læknaritara með forstöðumönnum Landspítalans um fyrirhugaða „útvistun" á störfum læknaritara á sjúkrahúsinu, og málefni sem því tengjast, hafa verið gagnlegan. 

Fram kemur á vef BSRB að fulltrúar stéttarfélaganna hefðu ítrekað mótmæli sín við einkvæðingu þessarar starfsemi og teflt fram rökum máli sínu til stuðnings.  Engin  sameiginleg niðurstaða varð á fundinum en ákveðið var að halda viðræðum áfram og horfa þá jafnframt til lengri tíma.

„Ég tel mjög mikilvægt að málið fái áframhaldandi  umræðu,“ er haft eftir Ögmundi á vef BSRB.  „Við skulum ekki gleyma því að um er að ræða lykilstörf í heilbrigðiskerfinu sem snúa að sjúklingum, persónuvernd og að sjálfsögðu látum við okkur ekki í léttu rúmi liggja þegar við teljum vegið að starfskjörum okkar félaga,“ sagði hann jafnframt.

Formenn BSRB og SFR sátu jafnframt fundinn sem fram fór í morgun.

• 1 blogg um fréttina

Bloggað um fréttina

• Ari Guðmar Hallgrímsson: Stórmerkilegt!!! Gagnlegur fundur???