Reykingahús úr snjó

Myndarleg viðbygging hefur nú risið utan við Edinborgarhúsið á Ísafirði. Húsið er úr snjó og er aðallega byggt með þarfir reykingarmanna í huga.

„Hugmyndasmiðurinn er Þórir Traustason, fráfarandi vert. Hann reifaði þessa hugmynd við mig og við ákváðum að ráðast bara í þetta. Við hringdum í Barða gröfukall sem kom og mokaði upp góðum haug“, segir Erik Newman sem nýverið keypti meirihlutann í rekstri Kaffi Edinborgar.

„Þetta er til að bregðast við því leiðindaveðri sem hefur verið upp á síðkastið, en reykingarfólk hafði af og til stolist til að reykja inni á baði. Við ákváðum að koma til móts við það með því að byggja bara sérstakt hús“, segir Erik.

„Það á að rigna fljótlega, en við ætlum að styrkja húsið með stoðum, í það minnsta ganginn. Svo frystir vonandi fljótlega aftur“, segir Erik Newman sem vonar að húsið standi í það minnsta fram yfir helgi.

Bæjarins besta

• 6 blogg um fréttina

Bloggað um fréttina

• Linda Rós Jóhannsdóttir: magnað
• Gísli Foster Hjartarson: Þetta kallast að redda sér
• Fanney Björg Karlsdóttir: Lausnamiðuð hugsun
• Ía Jóhannsdóttir: Að deyja ekki ráðalaus
• Eyrún Gísladóttir: lungnabólga
• Birgit Raschhofer: Snilli !