Innlent | mbl | 17.2.2008 | 20:46 | Uppfært 21:05

Samningar undirritaðir í Karphúsinu

Úr Karphúsinu í kvöld Árvakur/'Arni Sæberg

Nýir kjarasamningar Starfsgreinasambandsins og Samtaka atvinnulífsins hafa verið undirritaði í Karphúsinu samkvæmt því sem fram kemur á vef Starfsgreinasambandsins. þar segir að með samningunum hafi markmið sambandsins um hækkun launa þeirra tekjulægstu, kaupmáttaraukningu og efnahagslegan stöðugleika að mestu náðst.

Á vef starfsgreinasambandsins segir:

„Kjör þeirra sem lægst hafa launin og kaupmáttur þeirra, sem setið hafa eftir í launaþróuninni hækka umtalsvert meira en annarra. Samið er um að taxtar hækki verulega og öryggisnetið þar með gert tryggara. Samið er til eins árs með möguleika á framlengingu í tvö ár ef efnahagslegar forsendur standast, m.ö.o. að aðrir, þar með talin stjórnvöld, axli einnig ábyrgð í efnahagslífinu þannig að verðbólga og vaxtabyrðin lækki. Þessi atrið geta tryggt kaupmáttaraukningu á samningstímabilinu.

Launataxtar hækka frá og með 1. febrúar s.l., um 18.000 krónur, um 13.500 krónur árið 2009 og 6.500 krónur árið 2010. Í samningum er fjallað um fyrstu skref að nýju kerfi veikinda-, slysa- og örorkuréttinda á almennum markaði, en grunnur er nú lagður að nýjum endurhæfingarsjóði aðila vinnumarkaðarins. Veruleg hækkun bóta slysatrygginga launafólks var markmið sem náðist í kjarasamningnum. Dánarbætur til eftirlifandi maka hækka um 31,4% og til barna mun meira. Bætur vegna varanlegrar örorku hækka um 71,2% og dagpeningar vegna tímabundinnar örorku um 65%.

Önnur markið Starfsgreinasambandsins svo sem um aukin framlög atvinnurekenda í fræðslu- og endurmenntunarsjóði náðist, einnig aukin vernd launafólks við uppsagnir og að tekið verði markvisst á kynbundnum launamun. Með kjarasamningum, sem Starfgreinasambandið hefur borið hita og þunga af, eru send mikilvæg skilaboð út í samfélagiðið. Skilaboð um stöðugleika á vinnumarkaði á Íslandi næstu þrjú árin, stöðugleika sem er afar mikilvægur í því óvissuástandi sem við blasir í atvinnu- og efnahagslífinu. Kjarasamningarnir eru til þess fallnir að styrkja íslenska vinnumarkaðinum og um leið tækifæri, ef vel til tekst, til að auka hagvöxt og þar með kaupmátt launafólks."