Þrettán greindust með HIV smit á síðasta ári

Þrettán einstaklingar greindust með með HIV-smit hér á landi á síðasta ári. Líklegt var talið að smit tengdist fíkniefnaneyslu í æð í sex tilfellum. Í fjórum tilfellum var smit talið tengjast kynmökum gagnkynhneigðra og í þremur tilvikum kynmökum samkynhneigðra.

Fram kemur í Farsóttafréttum landlæknisembættisins, að af þeim sem greindust á árinu voru sjö konur en þetta er í fyrsta sinn sem fleiri konur greinast með HIV-smit en karlar á Íslandi.

Óvenju mörg HIV-tilfelli tengdust fíkniefnaneyslu og voru líkur leiddar að því að um hópsýkingu gæti verið að ræða. Veirufræðideild Landspítalans hefur unnið að samanburði HIV-stofna sem greindust á árinu 2007. Niðurstöður þessara rannsókna sýna að einungis tveir einstaklingar, sem sprautuðu sig reyndust vera með sama veirustofn. Þessar niðurstöður benda því til þess, að ekki hafi verið um eiginlega hópsýkingu að ræða meðal fíkniefnaneytenda á árinu 2007.

Áfram verður fylgst náið með útbreiðslu HIV-smits meðal fíkniefnaneytenda. Segir landlæknisembættið að nái HIV-smit fótfestu í þessum áhættuhópi megi búast við stóraukinni útbreiðslu sjúkdómsins hér á landi.

Margir greindust með lifrarbólgu B

Óvenju margir greindust með lifrarbólgu B á síðasta ári eða 45 manns. Um helmingur þeirra voru innflytjendur og vitað var um átta sem höfðu sprautað sig með fíkniefnum. Síðast gekk yfir faraldur meðal fíkniefnaneytenda á árunum 1989–1991.

Embættið segir mikilvægt, að bjóða fíkniefnaneytendum, sem ekki hafa smitast af lifrarbólgu B, bólusetningu gegn sjúkdómnum til að koma í veg fyrir nýjan faraldur í þessum hópi.