Vélin enn ófundin

Piper Cherokee flugvélin, sem hvarf af ratsjá um kl. 11:30 í dag, um 130 sjómílur suðsuðaustur af Hornafirði, er enn ófundin. Hætt hefur verið að leita úr lofti vegna myrkurs en varðskip Landhelgisgæslunnar er enn á svæðinu.

Ekkert hefur sést til flugmannsins eða vélarinnar. Vélin er skráð í Bandaríkjunum og flugmaðurinn er bandarískur. 

Fokker flugvél Landhelgisæslunnar TF-SYN er komin til Reykjavíkur og  TF-LIF, þyrla Gæslunnar, er væntanleg hvað og hverju.

Nimrod leitarflugvél breska flughersins yfirgaf leitarsvæðið um kl. 20:45 í kvöld, en hún hefur verið við leit í allan dag.

Aðstæður til leitar á svæðinu hafa verið erfiðar. Ölduhæð hefur verið mikil og þá hefur verið mjög hvasst.

Stefnt er að því að halda leitinni áfram á morgun, en ákvörðun um það verður tekin í fyrramálið.  

• 1 blogg um fréttina

Bloggað um fréttina

• Þorsteinn Valur Baldvinsson: Skjótari viðbrögð