Kristján: Ástandið á Reykjanesbraut áhyggjuefni

Kristján L. Möller samgönguráðherra segir það áhyggjuefni að framkvæmdir við tvöföldun Reykjanesbrautar hafi stöðvast. „Auðvitað er þetta mikið áhyggjuefni, og ég tala nú ekki um á þessum árstíma,“ segir Kristján í samtali við mbl.is.

Kristján segir að Vegagerðin vinni hörðum höndum að því að útbúa ný útboðsgögn. „Það var auðvitað svekkelsi að þess þyrfti, vegna þess að það tefur verkið.“ 

Í gær voru tveir fluttir á slysadeild þegar tvær bifreiðar rákust saman við Vogaafleggjarann á Reykjanesbraut. Vegurinn lokaðist í rúman klukkutíma á meðan unnið var að því að koma ökumönnunum til aðstoðar.

Lögreglan á Suðurnesjum hefur sagt að þær tafir sem hafa orðið á tvöföldun Reykjanesbrautar séu slæmar og bent á að talsverð hætta geti skapast við þær hjáleiðir sem nú eru á Reykjanesbrautinni, ekki síst vegna þeirrar vetrarfærðar sem hefur verið að undanförnu.

Þá er skemmst að minnast þess þegar lögreglan varð að loka Reykjanesbrautinni í síðasta mánuði í nokkrar klukkustundir vegna veðurs en fjölmargir bílar sátu fastir við þrengingarnar á veginum.

„Auðvitað hefur maður miklar áhyggjur af þessu eftir að verktakinn sagði sig frá verkinu og það náðust ekki samningar um að klára. Þá fór þessi útboðsferill í gang, sem var nú reyndar byrjaður. En þeir [Vegagerðin] voru byrjaðir að undirbúa [útboð] ef til þess kæmi,“ segir Kristján og bendir á að það hafi gerst strax eftir að ljóst var hvert stefndi. 

Samkvæmt Vegagerðinni er stefnt að því að framkvæmdunum ljúki í haust. 

• 1 blogg um fréttina

Bloggað um fréttina

• Guðrún Emilía Guðnadóttir: Áhyggjuefni! vita þessir menn hvað það er?