Beraði sig og þuklaði á kynfærum

Karlmaður á fimmtugsaldri, sem grunaður er um að hafa kynferðislega áreitt ungar stúlkur í Sundmiðstöð Keflavíkur um helgina, var handtekinn í Leifsstöð í gærmorgun á leið úr landi.

Sjö kærur hafa borist lögreglunni á Suðurnesjum undanfarna daga vegna atviksins og hafði verið gefin út handtökuskipun á hendur manninum þegar hann var stöðvaður á Keflavíkurflugvelli.

Maðurinn er grunaður um að hafa sært blygðunarkennd hóps ellefu ára telpna í sundlauginni í Reykjanesbæ um helgina, en maðurinn mun hafa berað kynfæri sín og þuklað á kynfærum nokkurra stúlknanna.

Maðurinn er einnig grunaður um tvö svipuð atvik sem áttu sér stað í sundlauginni í lok janúar, en þá tókst ekki að hafa hendur í hári hans. Kærur vegna þeirra brota hafa einnig verið lagðar fram gegn manninum og eru því kærur á hendur honum orðnar níu talsins.

Lögregla fór fram á að maðurinn yrði úrskurðaður í fjögurra vikna gæsluvarðhald í ljósi fjölda ákæra og alvarleika brotanna, en Héraðsdómur Reykjaness féllst ekki á það en dæmdi manninn í sex vikna farbann. Lögregla mun kæra gæsluvarðhaldsúrskurðinn til Hæstaréttar í kjölfarið. 

• 3 blogg um fréttina

Bloggað um fréttina

• Sigþór R.: öfuguggahátturinn.
• Helga skjol: Ekki spurning
• Skafti Elíasson: Innilokun fyrir kynferðisbrotamenn