Innlent | mbl | 14.3.2008 | 12:35

Inflúensan væg í ár

Sverrir Vilhelmsson

Inflúensan hefur að því er virðist verið fremur væg það sem af þessum vetri og kom tiltölulega seint. Flestir þeirra sem hafa veikst eru ungir að árum en einungis 14% þeirra sem hafa greinst með inflúensu eru 60 ára og eldri. Þetta kemur fram í Farsóttarfréttum landlæknisembættisins.

Að þessu sinni er stuðst við vikulegar upplýsingar frá Læknavaktinni á höfuðborgarsvæðinu um fjölda sjúklinga sem þangað hafa leitað og hlutfall þeirra sem greindust með inflúensulík einkenni á tímabilinu frá 1. desember 2007 til 8. mars 2008.

Á sama tíma hefur veirufræðideild Landspítalans greint inflúensuveiru í sýnum frá 35 sjúklingum en þar af voru 13 með inflúensu A og 22 með inflúensu B.

Inflúensan hefur greinst nokkuð reglulega frá áramótum en virðist ekki hafa haft marktæk áhrif í samfélaginu fyrr en í lok janúar. Enn er of snemmt að fullyrða um að inflúensan sé í rénun, samkvæmt Farsóttarfréttum landlæknisembættisins.

40% sjúklinga yngri en tíu ára

„Af inflúensu A hefur einungis greinst undirstofninn H1N1 það sem af er. Þetta er óvenjulegt því að yfirleitt er undirstofninn H3N2 ráðandi þegar inflúensa A gengur. Það sem einkennt hefur inflúensufaraldurinn hingað til er tiltölulega lágur aldur sjúklinganna, en meðalaldur þeirra er 25 ár, og 40% sjúklinganna eru yngri en 10 ára. Einungis 14% sjúklinganna eru 60 ára og eldri.

Nærtæk skýring er sú að þar sem H1N1-stofninn og inflúensa B eru yfirleitt sjaldgæfari en H3N2, er líklegt að ungt fólk sé næmara fyrir H1N1 en þeir sem eldri eru. Önnur hugsanleg skýring er að fleiri en venjulega í aldurshópnum 60 ára og eldri hafi látið bólusetja sig gegn inflúensu, eins og mælt er með," að því er segir í Farsóttarfréttum.