16 óku of hratt í íbúðargötu í Hafnarfirði

Brot 16 ökumanna voru mynduð á Hvannavöllum í Hafnarfirði í dag. Fylgst var með ökutækjum sem var ekið Hvannavelli í norðurátt, að Kvistavöllum. Á einni klukkustund, eftir hádegi,  fór 31 ökutæki þessa akstursleið og því ók meirihluti ökumanna, eða 52%, of hratt eða yfir afskiptahraða.

Að sögn lögreglu var meðalhraði hinna brotlegu tæplega 49 km/klst en þarna er 30 km hámarkshraði. Sjö óku á 50 km hraða eða meira en sá sem hraðast ók mældist á 68.

Eftirlit lögreglunnar á Hvannavöllum er hluti af sérstöku umferðar- og hraðaeftirliti í og við íbúðargötur í umdæminu en unnið er eftir ábendingum frá starfsmönnum svæðisstöðva lögreglunnar.

Á Hvannavöllum var staðsett ómerkt lögreglubifreið sem er búin myndavélabúnaði. Reynslan hefur sýnt að notkun slíks búnaðar gefur gagnlegar upplýsingar um ástand umferðarmála og auðveldar leit að lausnum þar sem þeirra er þörf.

• 3 blogg um fréttina

Bloggað um fréttina

• Ragnheiður Ólafía Davíðsdóttir: Tími til kominn að mæla hraða í íbúðagötum.
• Guðrún María Óskarsdóttir.: Lögreglan stendur sig vel.
• Frikkinn: Hraðmælingu strax