Innlent | mbl | 28.3.2008 | 17:20

Hagræðing, bætt stjórnsýsla og skýr ábyrgð

Frá fundi tollvarða á Suðurnesjum í gær þar sem fyrirhugaðar skipulagsbreytingar voru harðlega gagnrýnda.

Dómsmálaráðuneytið segir, að rökin fyrir þeim breytingum, sem boðaðar hafa verið á skipulagi lög- og tollgæslu á Suðurnesjum, séu alveg skýr: hagræðing, bætt stjórnsýsla og skýr ábyrgð. Undanfarin ár hafi rekstur embættisins farið fram úr fjárheimildum og með þessum aðgerðum sé verið að leggja traustari grunn að skilvirkari stjórnsýslu og betra rekstrarumhverfi.

Ráðuneytið segir, að það að lögreglu- og tollstjórinn á Suðurnesjum hafi haft á einni hendi lög-, öryggis- og tollgæslumál sé arfur frá þeim tíma þegar utanríkisráðuneytið fór með yfirstjórn mála á Keflavíkurflugvelli fyrir hönd allra ráðuneyta meðan á dvöl varnarliðsins stóð. Með breytingunni sé verið að færa stjórnsýslulega skipan mála í það horf sem almennt er í landinu.

Skipulagsbreytingarnar miði að því að saman fari stjórnsýsluleg og rekstrarleg ábyrgð og þær séu ekki settar fram í sparnaðarskyni heldur miðist að því að færa verkefnin undir forsjá þess ráðuneytis sem beri ábyrgð á hverjum málaflokki: tollgæslan heyri undir fjármálaráðuneytið, öryggismál séu á forræði samgönguráðuneytis og löggæsla og landamæragæsla áfram á forræði dóms- og kirkjumálaráðherra.

„Breytingarnar munu ekki hafa í för með sér minni samvinnu lögreglu, landamæragæslu, tollgæslu og öryggisgæslu á Keflavíkurflugvelli og eiga því á engan hátt að draga úr þeim árangri sem náðst hefur. Hér eftir sem hingað til munu tollverðir, lögreglumenn og öryggisverðir ákveða og skipuleggja samstarfið sín á milli þannig að það verði sem árangursríkast. Markmiðið er að styrkja hverja einingu en um leið að halda í heiðri og efla samstarfið á milli þeirra. Tekið skal sérstaklega fram að ekki stendur til að færa landamæragæslu frá lögreglustjóraembættinu," segir dómsmálaráðuneytið.

Þá er tekið fram, að ráðuneytinu hafi ekki borist uppsögn frá Jóhanni R. Benediktssyni, sýslumanni. Jóhann upplýsti á fundi með lögreglumönnum í dag, að hann hefði óskað eftir fundi með ráðherra til að ræða starfslok sín.