Innlent | mbl | 1.4.2008 | 9:15

Hefur ekki sagt formlega upp

Lögreglustöðin í Reykjanesbæ Af vef lögreglunnar

Jóhann R. Benediktsson, lögreglustjóri á Suðurnesjum, hefur ekki sagt formlega upp og er enn starfandi lögreglustjóri, samkvæmt upplýsingum frá aðstoðarmanni dómsmálaráðherra, Þóri Hrafnssyni.

Að sögn Þóris eru menn að tala saman um málefni embættisins og segir Þórir að menn hafi ekki langan tíma til stefnu.

Þann 19. mars sendi dómsmálaráðuneytið frá sér tilkynningu þar sem tilkynnt var um skipulagsbreytingar á embætti lögreglustjórans á Suðurnesjum, þannig að yfirstjórn tollgæsluverkefna verði óskoruð á forræði fjármálaráðherra og yfirstjórn öryggisverkefna vegna flugverndar á Keflavíkurflugvelli verði á forræði samgönguráðherra. Löggæsla og landamæragæsla verði áfram á forræði dóms- og kirkjumálaráðherra. Engar uppsagnir eru fyrirhugaðar í tengslum við breytingarnar.

Skipulagsbreytingarnar fela í sér að yfirstjórn löggæslu-, tollgæslu- og öryggisgæslumála á Keflavíkurflugvelli verður ekki öll í höndum lögreglustjórans á Suðurnesjum. Eftir breytingarnar verða tollgæsluverkefni á forræði fjármálaráðherra og öryggisgæsla á Keflavíkurflugvelli vegna flugverndar á forræði samgönguráðherra. Löggæsla og landamæragæsla verður áfram á forræði lögreglustjórans og dóms- og kirkjumálaráðherra.

Á föstudag kom fram í tilkynningu frá ráðuneytinu að rökin fyrir breytingunum séu alveg skýr; hagræðing, bætt stjórnsýsla og skýr ábyrgð.

„ Undanfarin ár hefur rekstur embættisins farið fram úr fjárheimildum og með þessum aðgerðum er verið að leggja traustari grunn að skilvirkari stjórnsýslu og betra rekstrarumhverfi. Það að lögreglu- og tollstjórinn á Suðurnesjum hafi haft á einni hendi lög-, öryggis- og tollgæslumál er arfur frá þeim tíma er utanríkisráðuneytið fór með yfirstjórn mála á Keflavíkurflugvelli fyrir hönd allra ráðuneyta meðan á dvöl varnarliðsins stóð. Með breytingunni er verið að færa stjórnsýslulega skipan mála í það horf sem almennt er í landinu.

Skipulagsbreytingarnar miða að því að saman fari stjórnsýsluleg og rekstrarleg ábyrgð og eru þær ekki settar fram í sparnaðarskyni. Þær miðast að því að færa verkefnin undir forsjá þess ráðuneytis sem ber ábyrgð á hverjum málaflokki; tollgæslan heyrir undir fjármálaráðuneytið, öryggismál eru á forræði samgönguráðuneytis og löggæsla og landamæragæsla áfram á forræði dóms- og kirkjumálaráðherra.

Breytingarnar munu ekki hafa í för með sér minni samvinnu lögreglu, landamæragæslu, tollgæslu og öryggisgæslu á Keflavíkurflugvelli og eiga því á engan hátt að draga úr þeim árangri sem náðst hefur. Hér eftir sem hingað til munu tollverðir, lögreglumenn og öryggisverðir ákveða og skipuleggja samstarfið sín á milli þannig að það verði sem árangursríkast. Markmiðið er að styrkja hverja einingu en um leið að halda í heiðri og efla samstarfið á milli þeirra.

Tekið skal sérstaklega fram að ekki stendur til að færa landamæragæslu frá lögreglustjóraembættinu," samkvæmt tilkynningu dómsmálaráðuneytisins frá 28. mars sl.