Vilja að Starfsgreinasambandið fari í aðgerðir

Á stjórnarfundi AFLs starfsgreinafélags sem var að ljúka var samþykkt  ályktun um stöðu kjaramála í ljósi verðhækkana og gengisfalls íslensku krónunnar að undanförnu. Er í henni hvatt til þess að Starfsgreinasambandið undirbúi aðgerðir til að verja kaupmátt launa. Verður ályktunin borin undir fund framkvæmdastjórn SGS þann 15. apríl.

„Stjórn AFLs Starfsgreinafélags telur nýgerðum kjarasamningum stefnt í hættu með verðhækkunum sem dynja á landsmönnum þessa dagana. Verði ekki gripið tafalaust til aðgerða til verndar kaupmætti launafólks áskilur félagið sér rétt til þeirra aðgerða sem nauðsynlega kunna að teljast til að verja árangur kjarasamninga. Ennfremur áréttar félagið að ekki er tímabært að ganga frá kjarasamningum fyrir aðra starfshópa en þegar er samið fyrir.

Stjórn AFLs lýsir yfir stuðningi við bílstjóra sem mótmælt hafa verðhækkunum að á eldsneyti og álögum á bifreiðar  síðustu daga en harmar að ástandið í þjóðfélaginu sé orðið þannig að launafólk finni sig knúið til að efna til mótmæla á götum úti, nokkrum vikum eftir að gengið var frá kjarasamningi.

AFL Starfsgreinafélag hvetur önnur verkalýðsfélög er gengu frá kjarasamningum í febrúar til að undirbúa aðgerðir til að knýja á um að þær kjarabætur sem samið var um, haldi."

• 1 blogg um fréttina

Bloggað um fréttina

• Þórdís Bachmann: Flottir AFL!