Innlent | mbl | 3.4.2008 | 11:27 | Uppfært 14:42

Áætlaður kostnaður við Helguvík 60-70 milljarðar

Tölvumynd sem sýnir hvar hugsanlegt álver í Helguvík myndi rísa.

Áætlað er að heildar kostnaður við fyrsta áfanga álvers Norðuráls í Helguvík verði 60-70 milljarðar íslenskra króna. Þar af er ríflega helmingur beinn erlendur kostnaður vegna kaupa á framleiðslubúnaði og tækni.

Um 15% koma til vegna kaupa á byggingarefni og búnaði. Áætlað er að vinnulaun við framkvæmdir verði um 15% kostnaðar eða nærri 10 milljörðum á þriggja ára tímabili. Kostnaður vegna hönnunar, framkvæmdastýringar og eftirlits er áætlaður 6-7 milljarðar. Sá þáttur verður að langmestu leyti í höndum íslenskra aðila og mun verkefnið því skila íslenskum verkfræðistofum, arkitektum og fleiri þekkingarfyrirtækum verulegum tekjum á næstu árum. Annar kostnaður, s.s vegna flutninga, trygginga samningagerðar ofl. er áætlaður um 6 milljarðar, samkvæmt upplýsingum frá Norðuráli.

Áformað er að hefja álframleiðslu í Helguvík síðla árs 2010 og að framleiðslugeta álversins verði þá um 150.000 tonn á ár

Heildarfjárfesting í ár 12-15 milljarðar króna

Að mati forráðamanna Norðuráls mun uppbygging álversins í Helguvík ekki valda óæskilegri þenslu í samfélaginu og fjarri lagi sé að tala um hættu á kollsteypu. Efnahagsleg áhrif verði lítil á þessu ári og þeirra fari ekki að gæta að ráði fyrr en 2009 og 2010. Gert er ráð fyrir að heildarfjárfesting vegna verkefnisins í ár verði 12-15 milljarðar íslenska króna. Langstærsti hlutinn kemur til vegna kostnaðar erlendis við kaup á búnaði með langan afhendingartíma.

Ágúst Hafberg, framkvæmdastjóri viðskiptaþróunar og samskipta hjá Norðuráli, segir í fréttatilkynningu að um erlenda fjárfestingu er að ræða með tilheyrandi innstreymi gjaldeyris.

„Til skemmri tíma eru þetta fyrst og fremst jákvæð skilaboð fyrir hagkerfið að fá erlenda fjárfestingu og gjaldeyri inn. Rólega til að byrja með og út þetta ár en svo af nokkrum krafti. Til lengri tíma kemur þetta verkefni á afar heppilegum tíma inn í hagkerfið eins og ýmsir hagfræðingar hafa nefnt undanfarið."