Innlent | mbl | 3.4.2008 | 9:45

Grindhoruðum ketti bjargað af lögreglu

Þessi köttur er vel haldinn mbl.is/Kristján

Íbúi í fjölbýlishúsi á Akranesi hafði samband við lögreglu þar í bæ í vikunni. Kvaðst hann vera búinn að heyra mjálm og kvein kattar í fleiri daga inni í mannlausri íbúð. Lögreglumenn fóru á vettvang og björguðu ketti sem virðist hafa verið skilinn eftir í íbúðinni. Var hann orðinn grindhoraður og illa haldinn. Farið var með köttinn á lögreglustöð þar sem hann þáði veitingar og síðan tók dýraeftirlitsmaður við honum.

Einhver óværa virðist hafa hlaupið í ökumenn í umdæmi lögreglunnar á Akranesi með hækkandi sól því hvorki meira né minna en 46 voru kærðir fyrir of hraðan akstur og var mældur hraði allt að 133 km á klst á 90 km vegakafla.

Sérstakt eftirlit var með ölvunar og fíkniefnaakstri í vikunni og voru fjórir ökumenn færðir á lögreglustöð grunaðir um akstur undir áhrifum ólöglegra fíkniefna.

Trillusjómaður kom að tveimur bifreiðum sem hann átti á Breiðinni með brotnum rúðum, um páskana. Í annarri hafði verið brotin ein rúða en allar í hinni. Gerðist þetta um hábjartan dag. Lögregla vildi gjarnan heyra í vitnum að þessum skemmdarverkum ef einhver eru eða það sem enn betra væri, að þeir sem þarna voru að verki segðu til sín.