Lundinn kominn á Víkina

Lundi sást á Víkinni, framan við Mýrdalinn, í gær og þykir það með fyrra fallinu. Sigurmundur G. Einarsson á trollbátnum Gæfu VE sagði að þar væri mikið líf. Fiskurinn fullur af síli og mikið af fugli.

Kristján Egilsson, forstöðumaður Fiska- og náttúrugripasafns Vestmannaeyja, sagði að svartfugl, mest álka, væri kominn til Eyja og hefði svartfugl farið að setjast upp fyrir nokkru. Ingvar A. Sigurðsson, fuglaáhugamaður og forstöðumaður Náttúrustofu Suðurlands í Vestmannaeyjum, sagði að fyrsta skrofa ársins hefði sést í fyrradag. Hann sagði að sjá mætti álkuhópa á sjónum við Eyjar, langvían væri mikið sest upp og ritan hefði komið fyrir löngu. Ingvar sagði að öll björg væru orðin útdrituð og vorlegt um að litast í fuglalífinu þótt lítið væri farið að hlýna.