Raforkan er umfram væntingar

Alcoa Fjarðaál hefur aukið raforkukaup sín af Landsvirkjun um 40 MW frá upphaflegum samningum, sem hljóðuðu upp á 537 MW. Þetta er gert því Kárahnjúkavirkjun skilar meiri raforku en gert var ráð fyrir í áætlunum og hægt var að auka framleiðslu álversins með auknum straumi á kerum þess. Framleiðslan verður 346.000 tonn á ári eins og starfsleyfi kveður á um.

Vegur upp í umframkostnað

Guðmundur Pétursson, yfirverkefnisstjóri Kárahnjúkavirkjunar hjá Landsvirkjun, segir þessa auknu orkusölu vega vel upp í umframkostnað vegna virkjunarinnar, en ástæður fyrir þessum miklu afköstum hennar eru nokkrar. Vatnsinnrennsli virkjunarinnar sé meira en ráð hafi verið fyrir gert, mótstaða í aðrennslisgöngum minni og nýtni vélasamstæðu Fljótsdalsstöðvar meiri en framleiðendur lofuðu.