Innlent | mbl | 15.4.2008 | 9:55

Neytendasamtökin með átak í verslunum

Neytendasamtökin hvetja neytendur til að taka þátt í samstilltu átaki á morgun á milli 15 og 18. Markmiðið er að hvetja verslanir til að sinna verðmerkingum betur og sjá til þess að þær séu ávallt réttar og til staðar.

Á vef Neytendasamtakanna kemur fram að allar vörur eiga að vera verðmerktar enda sé það forsenda þess að neytendur geti tekið meðvitaða ákvörðun við kaup. Því miður er allt of algengt að verðmerkingar vanti eða að verðupplýsingar séu rangar og slíkt er ólíðandi. Í matvöruverslunum getur verð á hillukanti verið annað en verð á kassa og dæmi eru um að tilboðsverð skili sér ekki á kassann.

Átakið felst í því að virkja sem flesta neytendur því með samtakamætti getum við haft áhrif og gert seljendum ljóst að við sættum okkur ekki við ófullnægjandi, rangar eða jafnvel engar verðupplýsingar," að því er segir á vef Neytendasamtakanna.