Innlent | mbl | 23.4.2008 | 21:15 | Uppfært 22:14

21 handtekinn í dag

Alls var 21 maður handtekinn í aðgerðum lögreglu á Suðurlandsvegi við Norðlingaholt vegna mótmæla flutningabílstjóra í dag og lagt var hald á sextán ökutæki. Vöruflutningabílstjórar lögðu bílum sínum á fyrrnefndum stað í morgun og lokuðu fyrir umferð.

Eins og komið hefur fram þurfti lögreglan m.a. að beita varnarúða en áður höfðu bílstjórarnir hunsað ítrekuð fyrirmæli lögreglu um að færa bílana úr stað. Einn lögreglumaður slasaðist í átökunum er hann fékk grjót í höfuðið og var hann fluttur á slysadeild. Hann er ekki alvarlega slasaður. Í hópi hinna handteknu voru umráðamenn ökutækja sem neituðu að hlýða ítrekuðum fyrirmælum lögreglu.

Lögreglan segir, að til rannsóknar séu ætluð brot þeirra gegn 168. gr. almennra hegningarlaga og 1. mgr. 27. gr. umferðarlaga, sem fjalla um röskun á umferðaröryggi á alfaraleiðum og að hafa lagt ökutæki á þeim stað að valdið geti hættu eða óþarfa óþægindum fyrir umferðina.