Innlent | mbl | 4.5.2008 | 18:56

Símafélagið Tal boðar 20-30% verðlækkun á fjarskiptamarkaði

Ákvörðun hefur verið tekin um að starfsemi fjarskiptafélaganna HIVE og SKO, sem nýlega voru sameinuð, verði framvegis rekin undir merkjum Tals. Starfsemi félagsins hefur verið endurskipulögð og verður megináhersla lögð á hefðbundna þjónustu vegna farsíma, heimasíma og internets með aðgangi að dreifikerfum Símans og Vodafone, segir í frétt frá fyrirtækinu.

Í frétt frá Tali segir að starfsemin verði einvörðungu grundvölluð á þjónustu og umtalsverður sparnaður á sviði hvers kyns tækniþróunar gerir félaginu kleift að bjóða heildarþjónustu, þ.e. farsíma, heimasíma og internet, að jafnaði á um 20-30% lægra verði en risarnir tveir á fjarskiptamarkaðnum, Síminn og Vodafone, hafa gert til þessa.

„Eigendur Tals eru Teymi, sem á 51% hlut og CP, sem á 49%, og er m.a í eigu Jóhanns Óla Guðmundssonar. Alls starfa um 40 manns hjá Tali um þessar mundir. Tal setur stefnuna á 20% hlutdeild á íslenska fjarskiptamarkaðnum innan þriggja ára og gerir jafnframt ráð fyrir því að innkoma félagsins leiði til aukinnar samkeppni á næstu misserum til hagsbóta fyrir neytendur í landinu. Tali er þannig ætlað að marka þáttaskil í fjarskiptaþjónustu á Íslandi – rétt eins og Tal gerði fyrir réttum tíu árum síðan þegar einokun Landsímans var sagt stríð á hendur. Nafn Tals var lagt til hliðar við sameiningu Tals og Íslandssíma á sínum tíma en var nýlega keypt til þess að verða á nýjan leik fánaberi lægra verðs og aukinnar þjónustu á fjarskiptamarkaði.“