Enn er leitað að bankaræningja

Leitin að manninum sem rændi útibú Landsbankans á Bæjarhrauni í Hafnarfirði í morgun stendur enn yfir. Maðurinn sem er sagður vera á þrítugsaldri huldi andlit sitt og ógnaði starfsfólki með hnífi.

Lögregla höfuðborgarsvæðisins sendi allt tiltækt lið til að leita í nágrenni við bankann og stendur sú leit enn yfir.

Að sögn varðstjóra lögreglunnar eru um 7 lögreglubílar og einhver mótorhjól á svæðinu en leitin hefur enn ekki borið árangur.

Boð um ránið barst lögreglunni frá öryggisfyrirtæki um klukkan 9.30 í morgun.

Maðurinn ógnaði starfsmönnum með hnífi og komst undan með einhverja fjármuni.  Hann var í hettupeysu og huldi andlit sitt með klúti.  Hann komst undan á hlaupum.

„Það er allt tiltækt lið að leita að ræningjanum, það er bara lágmarksgæsla í öðrum borgarhlutum núna," sagði varðstjóri lögreglunnar á höfuðborgarsvæðinu í samtali við Fréttavef Morgunblaðsins fyrir skömmu. 

Hugsanlegir vitorðsmenn eða farartæki notuð við flóttann hafa ekki verið nefnd í tengslum við leitina.

• 2 blogg um fréttina

Bloggað um fréttina

• Einar Bragi Bragason.: Bensín og olía
• Hlynur Hallsson: "Lágmarksgæsla í öðrum borgarhlutum núna..."