Kjarnabúð ehf fer í samstarf við þýska ferðaskrifstofu

Rekstarfyrirtækið Kjarnabúð ehf, sem er í eigu Vagnssystkina í Bolungarvík, undirritaði í dag tæplega 400 milljóna króna samning við þýsku ferðaskrifstofuna Kingfisher Reisen sem er ein af stærstu evrópsku ferðaskrifstofum sem sérhæfa sig í ýmiskonar stangveiðiferðum, að því er kemur fram í tilkynningu frá fyrirtækinu.

Þar segir að samningurinn sé gerður til fimm ára.  Kjarnabúð ehf. hyggst ráðast í framkvæmdir og uppbyggingu fyrir þetta verkefni fyrir tæpar 300 milljónir á næstu þremur árum.  Ætlunin er að byggja 20 hús í Bolungarvík til að þjónusta sjóstangveiðimenn á vegum Kingfisher reisen.  Einnig verða smíðaðir 20 bátar fyrir verkefnið. 

Kingfisher Reisen hóf rekstur árið 1987 og þjónustar milli 7.500 og 8.000 viðskiptavinum á ári, flestir þeirra koma frá Þýskalandi, Austurríki og Sviss. Til þessa dags hafa áfangastaðir Kingfisher verið Noregur, Svíþjóð, Írland, Canada og Alaska. Nú bætist við nýr og spennandi áfangastaður, Bolungarvík á Íslandi.

• 1 blogg um fréttina

Bloggað um fréttina

• Þorsteinn Valur Baldvinsson: Gleðilegt