Rebbi gæðir sér á eggjum

Tófan gerir vart við sig á Ströndum þegar fuglalífið er farið að glæðast á vorin og leitar hún þá gjarnan niður í fjöru. Fréttavefurinn strandir.is náði á dögunum myndum í návígi af eggjaþjófi sem hefur gert sig heimakominn í varplandinu og étið æðaregg af mikilli elju. Einnig hafa tjaldur og sandlóa einnig orðið fyrir barðinu á honum.

„Rebbi hafði rænu á að hafa sig á brott áður en refaskyttan mætti á staðinn og slapp í bili. Fastlega má þó reikna með að græðgin verði honum að falli einhvern næstu daga“, segir á strandir.is.

„Rebbi var hinn rólegasti á meðan myndatökumaður athafnaði sig í fárra metra fjarlægð, en hafði sig á brott áður en önnur vopn en myndavélin voru dregin fram. Hann er búinn að éta egg úr allnokkrum æðarhreiðrum síðustu daga, ljósmyndaranum til lítillar ánægju“, segir á vefnum.

Þar kemur fram að tjaldarnir á svæðinu voru heldur hnípnir eftir heimsóknina, enda var farið að styttast í ungana.

Strandir.is 

• 2 blogg um fréttina

Bloggað um fréttina

• Jón Snæbjörnsson: Ég veit ekki.........
• Bergur Thorberg: Eggjatökuverur (ath.semd frá rebbavinafélaginu)