1708 pör gengu í hjónaband í fyrra

Árið 2007 gengu 1708 pör í hjónaband, samkvæmt tölum, sem Hagstofan hefur birt. Auk þess staðfestu 19 pör samkynhneigðra samvist, tíu pör karla og níu kvenna. Á sama tíma skráðu 2089 gagnkynhneigð pör sig í óvígða sambúð.

Með lögum árið 2006 var samkynhneigðum gert kleift að skrá sig í sambúð hjá Þjóðskrá. Það ár skráðu sig 52 pör samkynhneigðra í sambúð. Árið 2007 féll þessi tala í 32 pör, 13 pör karla og 19 kvenna. Lögskilnaðir árið 2007 voru 515 og 603 pör skráðu sig úr sambúð.

Hagstofan segir, að giftingartíðni sé fremur lág hér á landi, líkt og á öðrum Norðurlöndum. Giftingartíðni reiknuð sem fjöldi hjónavígsla á hverja 1000 íbúa var 5,5 árið 2007 samanborið við 5,8 ári fyrr. Giftingartíðni lækkaði ört frá miðjum 8. áratugnum og náði sögulegu lágmarki árið 1990 en þá var giftingartíðni 4,5 af hverjum 1000 íbúum. Eftir það hækkaði giftingartíðnin og hefur verið á bilinu 5,2 til 5,8 frá síðustu aldamótum. 

Langflest hjónabönd eiga sér stað að undangenginni óvígðri sambúð. Samkvæmt upplýsingum af hjónavígsluskýrslum bjuggu 85% allra hjónaefna saman áður en þau festu ráð sitt. Skráðar sambúðir eru alla jafna fleiri en hjónavígslur. Stofnaðar sambúðir voru 6,7 af 1.000 íbúum árið 2007.

Meðalgiftingaraldur og meðalaldur við stofnun sambúðar hefur hækkað ört undanfarna áratugi. Lægstur varð meðalgiftingaraldur í upphafi 8. áratugar 20. aldar en þá voru áður ógiftir karlar 24,8 ára þegar þeir gengu í hjónaband en konur 22,9 ára. Nú er meðalgiftingaraldur áður ógiftra karla 34 ár en kvenna 31,9. Meðalaldur við stofnun sambúðar er 29,3 ár meðal karla en 27,2 ár meðal kvenna.

Þótt giftingartíðni hafi hækkað á undanförnum árum hefur skilnaðartíðni staðið í stað. Skilnaðartíðni hækkaði úr um það bil 1 í 2 á hverja 1000 íbúa á 8. áratug 20. aldar en hefur verið stöðug síðan þá. Samanborið við önnur lönd í norðan- og vestanverðri Evrópu er skilnaðartíðni hér á landi lág. Af einstökum Norðurlöndum er skilnaðartíðni hæst í Danmörku (um 2,8 á 1000 íbúa).

Svonefnt uppsafnað skilnaðarhlutfall, sem mælir hversu mörg hjónabönd enda með skilnaði, var 34% árið 2007 miðað við 35% árið 2006. Hagstofan segir, að alls staðar á Norðurlöndum sé uppsafnað skilnaðarhlutfall hærra en hér, hæst í Svíþjóð en þar enda 55% hjónabanda með skilnaði.

• Blogga um frétt